Vágestur í Volkswagen

Dæmdur fyrir tvö morð – Grunaður um fleiri

Ritstjórn DV
Laugardaginn 10. mars 2018 18:00

Árið 2000 var Þjóðverjinn Ulrich Muenstermann sakfelldur í Þýskalandi og dæmdur í lífstíðarfangelsi fyrir morð á ungri konu árið 1983. Á þeim sautján árum sem liðu frá morðinu til sakfellingar var Ulrich á ferðinni, og öðrum þræði á flótta, allra enda á milli á meginlandi Evrópu, aðallega á bláum og hvítum Volkswagen-húsbíl.

Þegar lögregla hóf leit að honum var það ekki eingöngu vegna morðsins heldur einnig í tengslum við rannsókn á að minnsta kosti þremur nauðgunum.

Úr mörgum morðum að moða

Ekki voru þó öll kurl komin til grafar þrátt fyrir handtöku hans og dóm. Mörgum árum síðar lá lögregla í fimm Evrópulöndum yfir skýrslum Interpol í von um að geta hent reiður á gjörðum Þjóðverjans, sem þá var í einangrun í frönsku fangelsi. Fannst lögreglu ýmislegt benda til að Ulrich kynni að eiga hlut að máli í allt að fimmtán óupplýstum morðum hér og hvar í Evrópu.

Þögull sem gröfin

Í mars 2007 uppgötvaði lögreglan í Wiesbaden í Þýskalandi að lífsýni gætu mögulega tengt Ulrich við morð sem framið hafði verið í Avallo, í Mið-Frakklandi, í maí 1989. Fórnarlambið var frönsk námskona að nafni Sylvie Baton. Í kjölfar þessa nýja vinkils var Ulrich framseldur frönskum yfirvöldum og var síðar sakfelldur fyrir morðið á Sylvie Baton.

Ulrich þessum, rafvirkja að mennt, hefur verið lýst sem „menningarlegum“ en það sem gerði lögreglu erfitt um vik að finna týnd stykki í púslið var að hann reyndist ekki maður margra orða. Hann var reyndar þögull sem gröfin.

Morð og mannshvörf

Það lá þó fyrir að Ulrich hafði borið niður í Plymouth í Bretlandi, eða þar í grennd árið 1983. Einnig var vitað að 1992 var hann kominn aftur til Þýskalands, þar afplánaði hann dóm vegna nokkurra nauðgana. Honum var síðan sleppt árið 1995.

Á meðal þeirra mála sem Ulrich var jafnvel talinn viðriðinn voru morð á tveimur konum og hvarf tveggja frænka.

Nathalie Maire var kyrkt með rafmagnsleiðslu og barin til bana með kústskafti í Burgundy í september 1997 og Christelle Blétry var stungin til bana, 113 sinnum, á sömu slóðum í desember árið áður.

Marie-Agnès Cordonnier og Francoise Bruyère, 22 ára frænkur frá Liège í Belgíu, hurfu af yfirborði jarðar árið 1984. Þær sáust síðast á lífi við brú yfir ána Ron við Macon í Frakklandi.

Ekki Slátrarinn frá Mons

Á tímabili var belgíska lögreglan sannfærð um að Ulrich og morðingi sem fékk viðurnefnið Slátrarinn frá Mons væru einn og sama maðurinn. Sá var þekktur fyrir að skera fórnarlömb í bita sem hann síðan henti í svörtum ruslapokum. Vitni gat þó kollvarpað þeirri kenningu því Slátrarinn talaði víst frönsku sem Ulrich Muenstermann getur ekki.

Lögmanni Ulrichs þótti nóg um kappsemi lögreglunnar og hafði á orði að það væri „aðeins of langt gengið að reyna að klína öllum óupplýstum morðum á hann [Ulrich]. Það er engu líkara en samfélagið þarfnist skrímsla og því eru þau jafnvel uppdiktuð.“

Kannski þriðja fórnarlambið

Hvað sem þessum orðum líður þá hljóp hugsanlega á snærið hjá lögreglunni í Dijon í Frakklandi árið 2017. Lögreglan telur rökstuddan grun um að Ulrich hafi átt hlut að máli í morði á Sylvie Aubert, 23 ára konu sem hvarf árið 1986. Sylvie var á heimleið að loknum vinnudegi í stórmarkaði í Chalon-sur-Saone til býlis foreldra sinna í Saint-Loup-de-Varennes. Lík hennar fannst í apríl 1987 í ánni Dheune.

Grunur lögreglunnar byggir á vitnisburði um að bíll hafi sést á þessum slóðum, hvítur og blár Volkswagen-húsbíll sem tilheyrt hafi sjónvarpsviðgerðarmanni. Einnig er vitað að Ulrich dvaldi þá í Chalon í um þriggja mánaða skeið. Niðurstaða hefur ekki fengist, en Ulrich dvelur enn á bak við lás og slá.

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Ekki missa af

Matur
Fyrir 2 klukkutímum

Fullkominn afgangamatur sem þarf lítið að hafa fyrir

Fullkominn afgangamatur sem þarf lítið að hafa fyrir
433Sport
Fyrir 2 klukkutímum

Ætlar að biðja Bale um að lána sér flugvél – Þarf að koma fólki á völlinn

Ætlar að biðja Bale um að lána sér flugvél – Þarf að koma fólki á völlinn
433
Fyrir 4 klukkutímum

Neville elskaði Lovren – Mjög skiljanleg kaup

Neville elskaði Lovren – Mjög skiljanleg kaup
Eyjan
Fyrir 4 klukkutímum

Wilhelm: „Skilnaður er því eina leiðin til að hækka launin um 60 þúsund á mánuði“

Wilhelm: „Skilnaður er því eina leiðin til að hækka launin um 60 þúsund á mánuði“
433
Fyrir 5 klukkutímum

England vann riðilinn eftir dramatík – Króatía niður um deild

England vann riðilinn eftir dramatík – Króatía niður um deild
433
Fyrir 5 klukkutímum

Ástæða þess að Mane fór grátandi af velli – Stuðningsmenn óánægðir með sinn mann

Ástæða þess að Mane fór grátandi af velli – Stuðningsmenn óánægðir með sinn mann
Fókus
Fyrir 6 klukkutímum

Hin dularfulla getnaðarvörn Rómverja

Hin dularfulla getnaðarvörn Rómverja
Matur
Fyrir 6 klukkutímum

Game of Thrones-viskí komið á markað: Ein tegund fyrir hverja seríu

Game of Thrones-viskí komið á markað: Ein tegund fyrir hverja seríu