Anthony Allen Shore, 55 ára fangi á dauðadeild í Texas, verður að líkindum fyrsti fanginn í Bandaríkjunum sem tekinn verður af lífi á þessu ári.

Anthony, sem kallaður var æðaklemmumorðinginn, játaði að hafa myrt fjórar ungar konur á árunum 1986 til 1995. Hann var hins vegar aðeins ákærður fyrir eitt þeirra, morð á 21 árs konu árið 1992, Mariu del Carmen Estrada. Hann viðurkenndi að hafa kyrkt fórnarlömb sín.

Það var ekki fyrr en árið 2003 að lögreglu tókst að tengja hann við morðið á Mariu. Lögregla hafði lagt hald á lífsýni sem fundust undir nöglum hennar og kom það heim og saman við DNA-sýni úr Anthony. Þá þegar sat hann í fangelsi eftir að hafa verið dæmdur í átta ára skilorðsbundið fangelsi fyrir kynferðisbrot.

Við yfirheyrslur hjá lögreglu viðurkenndi hann að hafa myrt þrjár konur eða stúlkur til viðbótar; níu ára stúlku og tvær táningsstúlkur. Hann braut kynferðislega gegn minnst þremur fórnarlamba sinna áður en hann myrti þau.

Tuttugu og þrír fangar voru teknir af lífi í Bandaríkjunum á síðasta ári. Upphaflega stóð til að taka Anthony af lífi í október síðastliðnum en aftökunni var frestað. Að því er bandarískir fjölmiðlar greina frá gæti aftakan farið fram á næstu dögum eða vikum.