18 líkamsárásir er Ísraelinn Elias Abuelazam grunaður um. Árásirnar gerði hann vopnaður hnífi á tímabilinu mars 2009 til ágúst 2010 og flestar í borginni Flint í Michigan í Bandaríkjunum, eða nágrenni hennar. Fimm manns létust af sárum sínum en fórnarlömbin áttu það sammerkt að vera bandarískir karlmenn af afrískum uppruna og frekar væskilslegir og litlir fyrir menn að sjá. Abuelazam fékk lífstíðardóm, án möguleika á reynslulausn, í júní árið 2012.
25 börn og um 200 fullorðnir voru, þann 27. júlí 2008, viðstödd sýningu í kirkju únítara í Knoxville í Tennessee þegar Jim nokkur Adkisson ruddist þar inn með gítartösku. Úr töskunni tók hann haglabyssu og lét skotunum rigna yfir kirkjugesti. Einn safnaðarmeðlima, Greg McKendry, fékk í sig banvænt skot þegar hann reyndi að vernda aðra og 61 árs kona, Linda Kraeger, lést síðar af sárum sínum. Ætlun Adkisson var að bana eins mörgum frjálslyndum og demókrötum og hann gæti. Afraksturinn var sem fyrr segir. Hann fékk lífstíðardóm í febrúar árið 2009.