Í ágúst árið 1977 kom Urho Kekkonen Finnlandsforseti í heimsókn til Íslands en hann var nokkuð þekktur á alþjóðavísu fyrir þýð samskipti heimalands síns við Sovétríkin. Var Finnland gjarnan kallað Kekkóslóvakía á þeim árum. Kekkonen renndi fyrir lax í Laxá í Kjós með fylgdarliði sínu. En forsetinn hrasaði og fékk kalt bað eins og kom fram á forsíðu Dagblaðsins. Greint var frá því að forsetinn hefði tekið þessu eins og sannur íþróttamaður og gert lítið úr atvikinu. Veiðinni var haldið áfram með allgóðum árangri og að minnsta kosti einn lax var dreginn á land eftir fallið.