Í maí mánuði var utanríkisráðherra Bandaríkjanna, William P. Rogers, í opinberri heimsókn hér á landi en þá var Víetnamstríðið og róttækni ungs fólks í hámarki. Einar Ágústsson, utanríkisráðherra Íslands, bauð Rogers að skoða fornritin í Árnagarði, eins og algengt er, en þegar þeir komu þangað voru um 150 stúdentar samankomnir á göngunum til að mótmæla heimsókninni og stríðinu. Stúdentarnir bundu fyrir hurðir og hleyptu ráðherrunum ekki inn. Þegar Rogers og fylgdarlið hans keyrðu í burtu eltu stúdentarnir. Einn þeirra stökk upp á þak bílsins og dældaði hann. Bílnum var ekið í átt til Bessastaða að hitta forsetann, en þá komst lögreglan að því að um 50 mótmælendur biðu á veginum með bensínbrúsa og naglabelti til að stöðva bifreiðina. Bifreið Rogers var því ekið suðurleiðina út á Álftanesið.