Juha myrti þriggja manna fjölskyldu – Flúði ítrekað úr fangelsi
Finninn Juha Veikko Valjakkala naut þess vafasama heiðurs að komast í hóp dæmdra glæpamanna í Svíþjóð og Finnlandi árið 1988, en það ár var hann sakfelldur fyrir að hafa myrt þriggja manna fjölskyldu. Morðin framdi hann í kirkjugarði í sænska sveitarfélaginu Åmsele í Norður-Svíþjóð.
Reyndar hafði Juha drepið niður fæti innan finnska réttarkerfisins en þá á grunni minni háttar afbrots. Honum hafði verið sleppt úr fangelsi í Turku í Finnlandi 1. maí 1988 og hjá honum tók við flandur um Svíþjóð og Finnland í félagsskap 21 árs kærustu sinnar, Maritu Routalammi.
Á þessum þvælingi, 3. júlí nánar tiltekið, komu skötuhjúin við í Åmsele. Eftir að húma fór að kveldi stal Juha reiðhjóli. Eigendur þess voru ekki par ánægðir með það og hófu Sten Nilsson og 15 ára sonur hans eftirför.
Eftirförinni lauk í kirkjugarði og þar lauk einnig jarðlífi feðganna; Juha skaut þá til bana með haglabyssu.
Ewa, eiginkona Stens og móðir Fredriks, kom innan skamms á vettvang í leit að þeim. Ewa reyndi að bjarga lífi sínu með því að hlaupa inn í skóg þar hjá, en Juha náði henni og skar hana á háls.
Viku síðar var parið handtekið í Óðinsvéum í Danmörku.
Eins og oft vill verða þá skelltu þau skuldinni hvort á annað við réttarhöldin, en frásögn Maritu var tekin trúarleg og bæði voru metin sakhæf.
Reyndar örlaði, að mati réttargeðlæknis, á siðblindu hjá Juha og hann metinn afskaplega árásargjarn.
Juha fékk lífstíðardóm fyrir þrjú morð en kærasta hans slapp með tveggja ára dóm fyrir aðild sína. Juha var sendur til Finnlands til afplánunar en Marita afplánaði aðeins helming síns dóms.
En sagan er ekki öll.
Juha reyndi að flýja úr fangelsi árið 1991, en hafði ekki erindi sem erfiði. Annað var upp á teningnum í apríl árið 1994 því þá tókst honum að flýja og tók kennara í gíslingu.
Juha gat þó ekki lengi um frjálst höfuð strokið því hann náðist skammt frá fangelsinu og slapp gíslinn frá þessum hremmingum án nokkurra áverka.
Árið 2002 flúði Juha úr Pyhäselkä-fangelsinu og komst til Svíþjóðar en í kjölfar umfangsmikillar lögregluaðgerðar var hann gripinn í Långträsk. Hann reyndi að fremja sjálfsmorð í klefa sínum síðar.
Og enn er sagan ekki öll.
Vindur nú sögunni fram til ársins 2004, en þá tókst Juha enn og aftur að flýja. Frelsið varði í aðeins nítján mínútur því hann var gripinn í innan við eins kílómetra fjarlægð frá fangelsinu.
En Juha lét ekki segjast og skömmu eftir miðnætti 28. nóvember 2006 lagði hann enn eina ferðina á flótta, í þetta skipti úr opnu fangelsi í Hamina.
Að kvöldi 30. nóvember réðst lögreglan inn í íbúð í Helsinki þar sem Juha hafði komið sér fyrir. Hann veitti enga mótspyrnu og var sendur í lokað fangelsi í kjölfarið.
Eftir 19 ára fangelsisvist var Juha veitt reynslulausn í febrúar árið 2008, en síðan handtekinn 12. apríl fyrir að brjóta gegn ákvæðum skilorðsins. Fyrir það fékk hann dóm, en náði þó að ganga í hjónaband með Alexöndru nokkurri í maí. Alexandra þessi kemur ekki frekar við sögu hér.
Í desember 2008 var ákveðið að Juha fengi reynslulausn á ný og gekk það eftir í febrúar 2009.
En hann endaði á bak við lás og slá á ný og flúði enn á ný, 23. nóvember 2011. Hann var gripinn 1. desember í Helsinki en hafði tekist að halda sér frá afbrotum þessa örfáu daga.
Juha hefur skipt nokkrum sinnum um nafn og meðal annars notað nöfnin Aslak Valdemar Ahonen, og Nikita Joakim Fouganthine. Hann er frjáls maður nú um stundir og gengur undir nafninu Nikita Bergenström.
