Ef þú vilt losna við óvelkomin skordýr af heimili þínu skaltu ekki feta í fótspor hins tuttugu og eins árs gamla David Doucette frá Maine í Bandaríkjunum.
Heiðarleg tilraun Davids til að losna við maura sem höfðu komið sér fyrir í kjallaranum á heimili fjölskyldunnar endaði með ósköpum: Húsið brann nánast til kaldra kola og drápust bæði heimilishundurinn og heimiliskötturinn í eldsvoðanum.
David var einn heima þegar hann ákvað upp á sitt einsdæmi að gera út um maurana. Notaði hann eldspýtur til að bera eld að mauraþyrpingu kjallaranum, en ekki vildi betur til en svo að eldurinn dreifði úr sér á örskotsstund með fyrrgreindum afleiðingum.
David brenndist sjálfur á höndum þegar hann forðaði hann sér út úr húsinu. Að sögn lögreglu var um óheppilegt slys að ræða og verða engir eftirmálar.
Þess má geta að þegar fregnir af brunanum spurðust út meðal íbúa við Old Orchard Beach, þar sem fjölskyldan býr, var sett á stað söfnun til handa fjölskyldunni. Var fjölskyldunni meðal annars úthlutað tímabundnu húsnæði. Þá hafa yfir 12 þúsund Bandaríkjadalir, 1,3 milljónir króna, safnast á aðeins tveimur dögum.