Langar þig að eignast smábæ? Þessi er til sölu og kostar 400 milljónir króna

Tiller var eitt sinn blómlegur iðnaðarbær

Einar Þór Sigurðsson skrifar
Sunnudaginn 19. mars 2017 08:00

Í vesturhluta Oregon, ekki ýkja langt frá kyrrahafsströnd ríkisins, stendur húsaþyrping sem lætur ekki mikið yfir sér. Hér er um að ræða smábæinn Tiller sem nú er til sölu eins og hann leggur sig og er verðið 3,5 milljónir dala, eða tæpar 400 milljónir króna.

Bærinn var fyrst boðinn til sölu árið 2015 en hann er á fínum stað, um 370 kílómetra suður af Portland í Oregon og stendur hann á 100 hektara landi. Íbúar í bænum eru aðeins tveir talsins, fyrrverandi kennari og prestur, en um 250 manns búa í næsta nágrenni.

Allt í allt eru sex hús í bænum sem fylgja með í kaupunum, þar á meðal íbúðir, bensínstöð, verslun og skóli.

Þó bærinn megi muna fífil sinn fegurri býður hann upp á ýmsa möguleika fyrir þá sem eru handlagnir og hafa pening á milli handanna. Eitt sinn var bærinn blómlegur iðnaðarbær en eftir að timburvinnsla lagðist af á svæðinu fækkaði íbúum mikið.

Garrett Zoller, fasteignasali sem sér um söluna, segir við breska blaðið Mirror að nokkur áhugi sé á bænum. Meðal annarra hafi kínverskir fjárfestar sýnt honum áhuga.

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Ekki missa af