Eiginmaður hans telur að hann hafi orðið fórnarlamb hatursglæps
Aðeins voru nokkrar klukkustundir liðnar af nýju ári þegar illa útleikinn líkami hins 25 ára gamla Joth Wilson fannst undir lestarbrú í Gladstone í Queensland-fylki í Ástralíu. Wilson, sem var frá Nýja Sjálandi, var háls-, bak- og rifsbeinsbrotinn auk þess hann var með verulega áverka á höfði. Þá var mæna hans slitinn í tvennt auk þess sem hræðileg brunasár voru um allan líkama hans.
Það þykir í raun með ólíkindum að Wilson sé á lífi en hann liggur nú á gjörgæsludeild Brisbane-spítala. Talið er að hann hafi fallið af brúnni og hrapað átta metra til jarðar. Talið er útilokað að hann muni nokkru sinni ganga á ný.
Nú hefur eiginmaður Wilson, hinn 33 ára gamli Maioha Tokotaua, stigið fram og heldur því fullum fetum að ráðist hafi verið á eigmann sinn og honum hent fram af brúnni. „Það voru menn sem höfðu áreitt okkur um nokkurt skeið eftir að einn þeirra hafði reynt við Joth og hann hafnað honum. Sá er í gagnkynhneigðu hjónabandi og á börn. Þetta snerist að minnsta kosti ekki um skuldir, peninga eða eiturlyf. Ástæða árásarinnar var sú að þeir voru hræddir um að Joth myndi ljóstra upp um raunverulega kynhneigð þeirra,“ segir Tokotaua samtali við The Sun.
Það var hann sem kom að stórslösuðum eiginmanni sínum. Wilson hafði brugðið sér út í búð rétt fyrir miðnætti til þess að kaupa pakka af sígarettum. Ráðgerðu hjónin að reykja saman síðustu sígaretturnar áður en þeir myndu hætta að reykja á nýju ári. Þeir voru tveir á ferðalagi um Ástralíu en á heimili þeirra í Nýja Sjálandi biðu þrjú fósturbörn þeirra.
Þegar Wilson skilaði sér ekki heim aftur fór Tokotaua að hafa áhyggjur og fór út að leita að honum. Eftir tveggja tíma leit um hverfið fann hann loks eiginmann sinn, hreyfingarlausan í blóði sínu undir brúnni.
Tilgáta lögreglu um brunasárin á líkama Wilson hafi orsakast þegar hann féll á rafmagnsvíra á leið sinni til jarðar. Tokotaua telur hinsvegar að eldfimum vökva hafi verið hellt á andlit og líkama eiginmanns síns og eldur borinn að. „Þetta var hatursglæpur gegn samkynhneigðum,“ segir hann.
Enn sem komið er þá er enginn grunaður um aðild að árásinni. Málið er enn í rannsókn hjá lögregluyfirvöldum í Queensland.