Bretinn Ian Brady, sem sakfelldur var ásamt kærustu sinni, Myru Hindley, fyrir morð á fimm ungmennum árin 1963 til 1965 er dauðvona. Brady er sá núlifandi fangi sem lengst hefur verið í fangelsi í Bretlandi. Hann var dæmdur í lífstíðarfangelsi án möguleika á reynslulausn árið 1966, eða fyrir 50 árum.
Brady, sem í dag er 78 ára, greindi frá þessu í bréfi sem hann sendi til Julians Druker, blaðamanns Channel 5 í Bretlandi. Í bréfinu sagðist hann hafa glímt við veikindi í lungum undanfarin tvö ár og nú væri stutt þar til hann þyrfti að játa sig sigraðan í þeirri baráttu.
Brady var sem fyrr segir dæmdur fyrir morð á fimm ungmennum á árunum 1963 til 1965. Saman voru þau dæmd fyrir morðin á Pauline Reade, 16 ára, John Kilbride, 12 ára, Keith Bennett, 12 ára, Lesley Ann Downey, 10 ára og Edward Evans, 17 ára. Mira Hindley lést árið 2002, 60 ára gömul.
Morðin voru nefnd Moors-morðin í ljósi þess að þrjú lík fundust grafin á heiði í Saddleworth Moor. Fyrst voru þau dæmd fyrir þrjú morð en árið 1987 voru þau dæmd fyrir tvö morð til viðbótar. Jarðneskar leifar fjögurra af fimm fórnarlömbum þeirra hafa fundist en líkamsleifar Keith Bennett hafa aldrei fundist.