Frjálshyggjumenn náðu að stimpla sig inn í umræðuna eftir áramótaskaupið með því að kalla eftir því að hægrimenn fengju sitt eigið skaup. Ástæðan sé vinstri slagsíðan í skaupinu 2018. Hannes Hólmsteinn skammaðist líka yfir skaupinu, sama gerði hinn dularfulli leiðarahöfundur Morgunblaðsins. Það verður að teljast ansi fyndið að sá hópur sem hefur talað um að „allt sé bannað nú til dags“, „pólitískur rétttrúnaður sé að drepa allt“ og „það megi aldrei grínast með neitt“ sé að kvarta undan bröndurum. Spurning hvort þeir fái ekki örlítið meira fjármagn frá kvótaeigendum og ríkisbanka til búa til sitt eigið hægri skaup til höfuðs vinstra skaupinu. Miðað við skopmyndateikningar Morgunblaðsins, sem voru reyndar teknar fyrir í skaupinu, þá yrði það skaup hressilega ófyndið.