Birgir Örn Guðjónsson, eða Biggi lögga, er nú í framboði fyrir Bæjarlistann í Hafnarfirði. Um er að ræða nýtt framboð og eðli málsins samkvæmt er framboðið ekki með neina vel smurða kosningamaskínu með jeppum, heilsíðuauglýsingum, sérstökum bæjarblöðum, úthringiveri og leigubílaþjónustu á kjördag. Biggi segir á Fésbók að hann og samstarfsfólk sitt sé ánægt á minnstu kosningaskrifstofu landsins og telur hann víst að kjósendur horfi til málefnanna en ekki umbúðanna: „Ég hef þá trú á kjósandanum að ég veit að hann horfi í dag á innihaldið en ekki bara umbúðirnar,“ segir Biggi. Þess má geta að fjárframlög ríkisins til stjórnmálaflokka hækkuðu um 127% síðustu áramót og hafa flokkarnir því alls 648 milljónum úr að moða.