Katrín Jakobsdóttir forsætisráðherra beindi spjótum sínum að samskiptamiðlum og þeim sem þá nota til að skammast í stjórnmálamönnum í ræðu sinni á 17.júní.
„Samskiptamiðlar og leitarvélar sem forritaðar eru með tilteknum hætti hafa þegar haft áhrif á stjórnmálaumræðu sem fer fyrst og fremst fram með yfirlýsingum sem ekki mega spanna meira en 280 stafabil. Sú staðreynd hefur gert það að verkum að dýpri stjórnmálaumræða á undir högg að sækja. Hver verða áhrifin af því? Nýtum tæknibreytingar til góðs og tryggjum að þær ýti ekki enn frekar undir sundrandi umræðu í pólitísku umhverfi sem nú þegar einkennist af því að samvinna og málamiðlanir sem lengi hafa verið undirstaða lýðræðissamfélagsins eru orðnar löstur en ekki kostur,“ sagði forsætisráðherra.
Margir spyrja sig um hvað hún hafi verið að meina. Segir SME á vef sínum að hún sé að amast yfir því að almenningur sé að tjá sig um stjórnmál og það á neikvæðan hátt um hennar ríkisstjórn. Aðrir vilja meina að hún sakni daga gömlu flokksblaðanna.
Það má einnig spyrja hvaða djúpa stjórnmálaumræða eigi undir högg að sækja? Hin djúpa IceSave-umræða? Hinar djúpu umræður um skipun flokksgæðinga í opinberar stöður? Hin djúpu helmingaskipti? Hin djúpa umræða um eignarhald ríkisins á bönkum?
Var á einhverjum tímapunkti dýpri stjórnmálaumræða en einmitt nú þegar allir geta tekið þátt hvenær sem er?