Ljósmæður vilja ekki semja um þá 4,21% kjarahækkun sem samninganefnd ríkisins býður upp á. Bjarni Benediktsson fjármálaráðherra sagði að þær væru að biðja um 20 prósenta hækkun, því hafna ljósmæður og segja augljóst að ríkið hafi aldrei ætlað að bjóða þeim annað en 4,21% hækkun.
Það væri líklegast auðveldara að semja bara við ráðherrann einan en að þurfa að stara á samninganefndina hans. Ráðherrar sjá sjálfir um að semja við einstaka hópa, eins og til dæmis kjararáðið sjálft. Hópur sem mikið mæðir á. Í tilefni af þrjósku núverandi ráðherra er áhugavert að minnast bréfsins sem Benedikt Jóhannesson, þáverandi fjármálaráðherra, fékk snemma hausts 2017. Þar bað kjararáð um 7,3% launahækkun afturvirkt.
„Þessi ósk um afturvirka hækkun kjararáðs barst í ráðuneytið meðan ég var ráðherra. Ég man vel viðbrögð mín þegar ég var spurður álits á efni bréfsins. Ég fór að skellihlæja og hristi höfuðið,“ sagði Benedikt á Facebook.
Haldnar voru kosningar, Benedikt hvarf, Katrín varð forsætisráðherra og Bjarni fór aftur í fjármálaráðuneytið. Sex dögum síðar fékk kjararáð 7,2% launahækkun og það afturvirkt nokkra mánuði aftur í tímann. Er ekki ráð að bjóða það á línuna frekar en 4,21%?