„Ég hef enga skoðun á þessu og ekki gefið þessu gaum“ segir Hjörleifur Guttormsson, fyrrverandi þingmaður Alþýðubandalagsins og ráðherra, um keppnina um veggmynd Sjávarútvegshússins sem atvinnuvega- og nýsköpunarráðuneytið efndi til í samstarfi við Samband íslenskra myndlistarmanna og lauk í lok mars. Hjörleifur segist ekki hafa séð úrslitin og vinningsverkið, Glitur hafsins, eftir listakonuna Söru Riel sem mun prýða vegg hússins.
Hjörleifur brást illa við spurningu blaðamanns um hvort hann hygðist kynna sér sigurverkið og tillögurnar allar þar sem hann hafi nú haft hátt um þetta áður. „Hvað varðar þig um það? Ég hávær? Hverslags rugl er þetta?“
Eins og mörgum er kunnugt hafði Hjörleifur sterkar skoðanir á vegglistaverki af sjómanni sem sett var upp á Sjávarútvegshúsinu í tengslum við tónlistarhátíðina Iceland Airwaves árið 2015. Hjörleifur, sem býr á Vatnsstíg, sendi byggingarfulltrúa Reykjavíkurborgar tölvupósta vegna myndarinnar og hafði RÚV þá tölvupósta í sínum fórum. Fór svo að málað var yfir myndina og vakti það mikið umtal í þjóðfélaginu.
Hjörleifur svaraði fyrir sjómannsmyndamálið síðasta sumar í aðsendri grein í Morgunblaðinu. Taldi hann málið blásið upp vegna gúrkutíðar. „Hver er staða stjórnenda Reykjavíkur gagnvart þeim sem ástunda veggjakrot á eignir borgarbúa og staðhæfa margir hverjir að þar sé um listaverk að ræða? Reykjavík er að verða útbíuð af þess háttar skrauti, Umhverfi Reykjavíkur verðskuldar önnur vinnubrögð en þau sem endurspeglast í þessu máli. – Höfuðstaðurinn þarf á jákvæðri samvinnu við íbúana að halda og trúnaði í samskiptum. Sem betur fer er hér ekki allt á verri veginn. Ég hef nokkrum sinnum leyft mér að hafa samband við garðyrkjudeild borgarinnar með ábendingar, sem brugðist hefur verið við jákvætt og eðlilega“ sagði Hjörleifur.
Hér má sjá vinningsverkið og allar tillögunar.