„Virkur spilafíkill, á hverjum einasta degi, þá niðurlægir hann sig. Aftur og aftur og aftur,“ segir Örn Sverrisson, spilafíkill í bata, í viðtali í þættinum Kveik sem sýndur verður á RÚV kl. 20 í kvöld. Í þættinum verður fjallað um fjárhættuspil á Íslandi, fjárhættuspil eru bönnuð hér á landi en þrátt fyrir það er hægt að finna spilakassa víða.
„Það eiga í rauninni allir hagsmuni að gæta þegar spilafíkilinn labbar inn með peninga,“ segir Alma Hafsteinsdóttir fíknimarkþjálfi hjá Spilavanda. Hún segir að ekki sé um að ræða herferð gegn spilakössum, það sem þurfi sé að allir taki ábyrgð á vandanum, ekki bara spilafíklar.
Örn lýsir spilafíkninni í þættinum.
„Ég fékk hjartaáfall 2010. Ég gat ekki labbað út af spítalanum eftir skurðina sem ég var með. Um kvöldið fór ég á Catalinu í Kópavoginum. Þú þarft að labba niður stiga, brattan, erfiðan stiga. Ég varð að fara að spila. Og það er ekkert sem stoppar þig.“
Örn bætir við:
„Það var aldrei neinn sem kom til mín og sagði „er þetta ekki komið nóg?“ Þeir eru í rauninni orðnir alveg jafn háðir peningunum eins og fíkillinn kassanum.“
Í þætti kvöldsins er einnig minnst á umfjöllun DV frá því í fyrra þar sem kom fram að starfsmenn Gallup færu í spilakassasali og fengju spilafíkla til þess að prófa nýja spilakassa. Blaðamenn DV fengu boð í spilakassaprófanir Gallup í höfuðstöðvum fyrirtækisins í Glæsibæ með því að segjast spila í allt að tólf klukkutíma fjórum til fimm sinnum í viku.