Helgi Jóhannsson svæfingalæknir er á lista dagblaðsins Evening Standard yfir áhrifamestu einstaklingana í London árið 2018 en hin árlegu verðlaun voru veitt í 12 sinn nú í gær. Á Progress 1000 listanum má finna fjölda einstaklinga sem hafa á einn eða annan hátt skarað fram úr í listum, tækni, stjórnmálum, vísindum, heimspeki og viðskiptum.
Helgi er yfirlæknir svæfinga á St. Mary‘s-háskólasjúkrahúsinu í London og var hann tilnefndur í flokki einstaklinga sem hafa skarað fram úr á sviði heilbrigðismála. Á þeim lista má til að mynda finna unglækninn Mark Sims, sem safnaði háum upphæðum til krabbameinsrannsókna áður en hann lést sjálfur úr sortuæxli á síðasta ári, ljósmóðurina Kade Moneh sem veitir ljósmæðrum í Úganda þjálfun og ráðgjöf og skurðlækninn Dr Veeru Kasivisvanathansem unnið hefur ötult rannsóknarstarf á sviði krabbameinslækninga.
Helgi hefur undanfarin misseri haldið úti síðu á samfélagsmiðlinum Twitter þar sem hann styðst við notandanafnið Dr. Helgi. Í færslum sínum leyfir hann fylgjendum sínum að skyggnast inn í hinn framandi heim læknisfræðinnar. Í lýsingu á vef Evening Standard kemur fram að Helgi sé „sprenglærður læknir sem kunni að nýta sér samfélagsmiðlana á skemmtilegan og upplýsandi hátt.“
Sem fyrr segir voru verðlaunin afhent í gærkvöldi og var það Sajid Javid innanríkisráðherra Bretlands sem hlaut titilinn Áhrifamesti einstaklingurinn 2018. Sajid tók við embættinu fyrr á þessu á ári en hann erfyrsti innanríkisráðherrann sem kemur úr þjóðernislegum minnihlutahópi.
