Kross er ekki kristlegt tákn heldur menningarlegt tákn segir Markus Söder leiðtogi þýska sambandsríkisins Bæjaralands. Stjórnvöld í Bæjaralandi hafa ákveðið að frá og með næstu mánaðarmótum eigi krossar að prýða allar opinberar skrifstofur í sambandsríkinu. Krossarnir eiga að vera við innganginn í byggingarnar.

Á Twitter sagði Söder að málið snúist um „sjálfsmynd Bæjaralands og kristileg gildi“. Söder er vanur að láta hendur standa fram úr ermum og því er hann að sjálfsögðu búinn að láta hengja upp kross við innganginn að eigin skrifstofu.

Óhætt er að segja að þetta hafi allt saman vakið mikla athygli og hefur háði og fordæmingum rignt yfir Söder undanfarið. Kristnir, bæði mótmælendur og kaþólikkar, hafa látið í sér heyra. Söder hefur verið gagnrýndur fyrir krossamálið og það sagt vera kosningabragð sem hann ætli að reyna að græða á en kosið verður í Bæjaralandi í haust.

Burkhard Hose, prestur í Würzburg, segir að ekki sé hægt að breyta krossinum í einhverja bæverska þjóðsögu. Wolfgang Bischof, biskup í München, segir að krossinn sé ekki tákn Bæjaralands og alls ekki eitthvað kosningatákn.

Krossar hafa verið bannaðir í skólum í Bæjaralandi frá 1995 en þá komst stjórnlagadómstóllinn að þeirri niðurstöðu að það stríddi gegn stjórnarskránni að láta þá vera uppi við í skólum. Þetta bann gildir í öllu Þýskalandi.