77 létust og 143 slösuðust í öflugum sandstormi í norðurhluta Indlands í gærkvöldi. Embættismenn segja að dánartölur eigi líklegast eftir að hækka. Tré rifnuðu upp með rótum, rafmagnsstaurar brotnuðu og húsveggir hrundu í óveðrinu sem reið yfir Rajasthan og Uttar Pradesh.

Eignatjón er mikið og það mun taka að minnsta kosti tvo daga að koma rafmagni aftur á á svæðinu. Eitt þekktasta kennileiti Indlands, Taj Mahal, er í Uttar Pradesh en það slapp óskemmt þrátt fyrir mikla eyðileggingu allt í kring.

Sky segir að yfirvöld hafi lýst því yfir að þau muni standa þétt við bakið á fólki á þessum erfiðu tímum.