Einn var skotinn til bana í Lundúnum í gærkvöldi og annar særðist í skotárás. Báðir mennirnir voru skotnir í norðvesturhluta borgarinnar. Um klukkan 21 var tilkynnt um særðan mann við Queensbury neðanjarðarlestarstöðina nærri Edgware. Þar fundu lögreglumenn karlmann á fertugsaldri og hafði hann verið skotinn. Hann lést um klukkustund síðar.
Klukkan 21.10 kom maður á þrítugsaldri á sjúkrahús í norðurhluta borgarinnar. Hann hafði verið skotinn. Ástand hans er sagt stöðugt.
Sky-fréttastofan segir að það sem af er ári hafi 59 morð verið framin í Lundúnum.
Enginn hefur verið handtekinn vegna skotárásanna í gærkvöldi en lögreglan hefur lokað stórum svæðum, þar sem talið er að skotárásirnar hafi verið gerðar, og vinnur þar að vettvangsrannsóknum.