Ítalska lögreglan rannsakar þessa dagana undarlegt og óhugnanlegt morðmál sem virðist tengjast mannáti, vúdú og mannfórnum í trúarlegum tilgangi. Þrír nígerískir karlmenn, 22, 27 og 29 ára, hafa verið handteknir en þeir eru grunaðir um að hafa myrt 18 ára ítalska stúlku, Pamela Mastropietro, en lík hennar fannst sundurhlutað í tveimur stórum ferðatöskum í bænum Macerata sem er um 200 km norðan við Róm. Mennirnir dvöldu ólöglega á Ítalíu. Málið hefur vakið mikinn óhug og kyndir enn frekar undir andúð margra í garð innflytjenda og flóttamanna.

Lögreglan hefur unnið að rannsókn málsins í þrjá mánuði. Meðal þess sem lögreglan hefur gert er að hlera símtöl tveggja hinna handteknu. Í símtölunum ræddu þeir um óhugnanlegar fyrirætlanir sínar um hvernig ætti að láta sundurhlutað lík Pamela hverfa. Blich.ch skýrir frá þessu.

Það hefði verið barnaleikur

Dögum saman hlustuðu lögreglumenn á samtöl tvímenninganna sem sátu þá í gæsluvarðhaldi. Þeir ræddu reiðir um af hverju þeim hefði mistekist að losa sig við líkið.

„Við hefðum átt að sturta því niður í klósettið.“

Sagði annar þeirra að sögn saksóknara.

Einnig ræddu mennirnir um eftirsjá yfir að hafa ekki fryst sundurhlutað líkið og borðað það í stað þess að setja það í ferðatöskur.

„Það hefði verið barnaleikur.“

Heyrast þeir segja á upptökunum. Í sama samtali eru þeir einnig sammála um að þeir „hafi gert verri hluti“.

Ítalskir fjölmiðlar hafa velt því upp að morðið tengist trúarlegum mannfórnum og mannáti.

Var deyfð og síðan myrt

Pamela Mastropietro var myrt þann 30. janúar að sögn lögreglunnar. Daginn eftir fundust tvær ferðatöskur fyrir tilviljun í vegkanti við bæinn Macerata. Í töskunum var sundurhlutað lík Pamela.

La Reubblica segir að krufning hafi leitt í ljós að Pamela hafi verið deyfð og síðan myrt með tveimur hnífsstungum í lifrina. Því næst var lík hennar hlutað í 20 hluta og klór hellt yfir það.

Pamela hélt til í athvarfi fyrir unga fíkniefnaneytendur. Lögreglan segir að hún hafi farið þaðan heim til eins Nígeríumannsins til að kaupa heróín af honum. Lögreglan fann blóð í íbúðinni, meðal annars á svölunum og í þvottavélinni en það þykir benda til að morðingjarnir hafi reynt að þvo blóðugan fatnað.

Pólitískur óróleiki og hefndaraðgerðir

Frá 2013 hafa Ítalir tekið á móti rúmlega hálfri milljón flóttamanna. Ekki eru allir sáttir við þennan mikla fjölda flóttamanna sem hefst við í landinu og hatur í þeirra garð er áberandi víða.

Það að Pamela var myrt af þremur nígerískum mönnum, sem dvöldu í óleyfi á Ítalíu, hefur kynnt enn frekar undir óbeit og hatri í garð flóttamanna og innflytjenda í landinu, sérstaklega meðal þeirra sem tilheyra ysta væng hægrimanna.

Í febrúar skaut 28 ára ítalskur karlmaður á sex manns í íbúðarhverfi í Maceratas en í þessu hverfi búa aðallega innflytjendur. Maðurinn er fyrrum félagi í öfgasinnuðustu samtökum hægrimanna.

Hann var handtekinn sama daga. Hann sagði að skotárásin hafi verið hefnd fyrir morðið á Pamela en hann þekkti hana ekki persónulega.