Fjölda danskra og hollenskra stefnumótasíðna hefur verið lokað og verður lokað í kjölfar uppljóstrana um starfsemi þeirra. Nöfn kvenna, sem eru á síðunum, eru fölsk og myndirnar sem eru notaðar eru flestar illa fengnar myndir af konum frá Austur-Evrópu. Á bak við myndirnar af þessum konum sitja síðan starfsmenn stefnumótasíðnanna og svara skilaboðum frá vongóðum karlmönnum sem greiða allt að 160 krónur fyrir hver skilaboð sem þeir senda.

Fjallað var um þessar stefnumótasíður í neytendaþætti Danska ríkissjónvarpsins, Kontant, í desember. Þar sýndi starfsmaður einnar stefnumótasíðu hvernig hann starfar við að svara karlmönnum og hvernig hann skiptir á milli prófíla fjölda kvenna og svarar skilaboðum ástfanginna og vongóðra karla til þeirra.

Í kjölfar umfjöllunar Kontant í desember fóru hollenskir þáttagerðarmenn á stúfana og fjölluðu um málið í þættinum De Monitor. Þeir hafa rannsakað stórt net falskra stefnumótasíðna og nú hafa hollensk yfirvöld gripið inn í málin.

Dönsku og hollensku þáttagerðarmennirnir komust að því að þræðir liggja frá dönskum stefnumótasíðum til Hollands og umfangsmikilla neta falskra evrópskra stefnumótasíðna sem velta mörg hundruð milljónum evra á ári að mati sérfræðinga.

Hollenska neytendaeftirlitið gerði húsleitir á mörgum stöðum vegna rannsóknar málsins og lagði hald á margar tölvur. Í framhaldi af þessum aðgerðum fengu danskir starfsmenn nokkurra stefnumótasíðna tölvupóst frá fyrirtækinu Dkworkfromhome sem réði þá til starfa. Í tölvupóstinum var þeim tilkynnt að stefnumótasíðunum verði lokað og því ekki meiri vinnu að hafa.

Mörg hollensk fyrirtæki sendu út sameiginlega tilkynningu um að þau hætti rekstri fölsku stefnumótasíðnanna frá og með 1. maí vegna vegna neikvæðrar fjölmiðlaumfjöllunar.

Margt bendir til að stefnumótasíðurnar hafi þróast yfir í mjög ábatasaman rekstur sem á rætur að rekja til klámiðnaðarins. Hollensk skjöl sýna að eigendur þessara fyrirtækja nota flókið eignarhald skúffufyrirtækja til að leyna hinu raunverulega eignarhaldi.