Johanne Schmith, danskur eldfjallafræðingur, vinnur nú að rannsóknum á ösku úr Kötlu en með rannsóknum sínum á hvernig askan í Kötlu myndast vonast hún til að geta undirbúið heiminn betur undir næsta stóra eldgos á Íslandi. Þetta kemur fram í umfjöllun Danska ríkisútvarpsins.
Fram kemur að það sé Volcanic Ash Advisory Centers (VAAC) sem sendir út viðvaranir um öskuský. Þar er fylgst vel með öskuskýjum og spár gerðar um dreifingu hennar þannig að hægt sé að beina flugumferð frá ákveðnum svæðum. Haft er eftir Schmith að ekki sé hægt að gera nákvæm líkön nema góð gögn séu fyrir hendi og þeirra gagna er hún að reyna að afla með rannsóknum sínum.
Án þessara gagna verður VAAC að starfa út frá varúðarsjónarmiðum og banna flugumferð lengur en hugsanlega er nauðsynlegt. Þetta hefur í för með sér mikil útgjöld fyrir flugfélögin og samfélagið og því munu rannsóknir Schmith hugsanlega geta sparað alþjóðasamfélaginu háar fjárhæðir í framtíðinni.
Hún rannsakar hæð öskuskýja, stærð öskunnar og magnið sem hefur komið upp í eldgosum. Þessar rannsóknir veita nýja þekkingu en Schmith hefur unnið að rannsóknum á ösku úr Kötlu úr gosum á sautjándu og átjándu öld.
„Við getum ekki spáð fyrir um næsta gos en með þeirri vitneskju sem við öflum úr tveimur fyrri eldgosum getum við gert nákvæmari spár um hvað muni gerast.“
Hefur Danska ríkisútvarpið eftir henni.