Margir starfsmenn bandaríska fjárfestingabankans Goldman Sachs geta líklegast verið sáttir við laun sín á fyrstu þremur mánuðum ársins. Bankinn greiddi 4,1 milljarða dollara í laun á þessum tíma en það svarar til þess að hver og einn af þeim rúmlega 37.000 sem starfa hjá bankanum hafi fengið 110.000 dollara í laun en það svarar til um 11 milljóna íslenskra króna.
Á sama tíma á síðasta ári voru meðallaunin 96.500 dollarar svo hækkunin er umtalsverð. En bankinn getur vel leyft sér að gera vel við starfsfólk sitt þar sem rekstrarniðurstaða fyrsta ársfjórðungs var mjög góð. Velta bankans jókst um 25 prósent miðað við sama tíma á síðasta ári og nam nú 10 milljörðum dollara. Hagnaður af rekstri bankans á þessum fyrstu þremur mánuðum ársins var 2,8 milljarðar dollara.