Töluverð þíða hefur verið í samskiptum Norður-Kóreu við granna sína í suðri og Bandaríkin undanfarnar vikur. Í síðustu viku tilkynnti einræðisstjórnin að hún væri hætt tilraunum með kjarnorkuvopn og langdrægar eldflaugar.
Fréttaskýrendur hafa túlkað þetta sem mikilvæg skilaboð frá Kim Jong-un, einræðisherra, í tengslum við fund hans með Moon Jae-in, forseta Suður-Kóreu, næstkomandi föstudag og með Donald Trump, Bandaríkjaforseta, á næstu vikum.
En ekki eru allir sannfærðir um að hugur fylgi máli hjá einræðisherranum unga og telja að hann geti verið að blekkja umheiminn en leiðtogar Norður-Kóreu hafa verið þekktir fyrir að standa ekki við gerða samninga.