Sænska lögreglan skaut mann til bana nú í morgunsárið. Lögreglan var kölluð að fjölbýlishúsi í Skärholmen, sem er sunnan við Stokkhólm, á fimmta tímanum í morgun en tilkynnt var að verið væri að misþyrma konu í íbúðinni. Þegar lögreglumenn komu á vettvang tók maður, vopnaður hnífi, á móti þeim og var hann að misþyrma konunni. Talsmaður lögreglunnar sagði að lögreglumenn hafi neyðst til að beita skotvopnum gegn manninum til að stöðva hann.

Aftonbladet skýrir frá þessu. Fram kemur að sjúkraflutningsmenn hafi strax hafist handa við að sinna manninum. Klukkan 06.20 að staðartíma tilkynnti lögreglan að maðurinn hefði verið úrskurðaður látinn.

Konan var flutt á sjúkrahús en hún er alvarlega slösuð.