Það er velþekkt að rússneskir tölvuþrjótar, hakkarar, á vegum rússneska ríkisins hafa verið mjög virkir á Vesturlöndum á undanförnum árum. Ekki er talið útilokað að umsvif þeirra séu miklu meiri en talið hefur verið fram að þessu. Rússnesku hakkararnir eru sagðir hafa beint sjónum sínum að því að ná stjórn á hug – og vélbúnaði sem er notaður til gagnaflutninga. Þetta gera þeir til að geta njósnað og stolið upplýsingum en einnig er hægt að nota þennan aðgang til árása síðar meir.
Þetta kemur fram í sameiginlegri yfirlýsingu frá breskum og bandarískum stjórnvöldum sem var send út í gær. Á fréttamannafundi í gær sagði Jeanette Manfra, hjá bandarísku þjóðaröryggisstofnuninni, að Bandaríkin og bandamenn þeirra væru „mjög viss um“ að Rússar standi á bak við þessar tölvuárásir.
Skotmörkin eru aðallega sögð hafa verið stjórnvöld og aðilar í einkageiranum. Meðal þeirra eru fyrirtæki sem koma að mikilvægum innviðum ríkja og netþjónustuaðilar. Þegar tekist hefur að smita hug- og vélbúnað geta hakkararnir grafið undan eldveggjum og öðrum öryggisbúnaði sem er einmitt ætlað að fylgjast með hvort hakkarar séu að ráðast á viðkomandi notendur.
Rannsóknir benda til að rússnesku hakkararnir hafi hugsanlega náð að smita margar milljónir tölva, sem eru notaðar til gagnaflutninga, af tölvuóværum.