Hin umdeilda sænska nýnasistahreyfing Nordiska Motståndsrörelsen hefur nú tekið upp nýjar aðferðir við að afla nýrra félagsmanna. Nú herja félagar í samtökunum á börn í Lorensbergaskolan grunnskólanum í Ludvika sem er norðaustan við Stokkhólm. Áhuga nasistanna á skólanum má rekja til atburðar sem þar varð í desember.

Dagens Nyheter skýrir frá þessu. Haft er eftir skólastjóra Lorensbergaskolan að nýnasistarnir séu að vinna sig inn í huga óöruggra ungmenna og að staðan sé alvarleg. Dagens Nyheter segir að Nordiska Motståndsrörelsen sé ofbeldisfyllsta hreyfing nýnasista í Svíþjóð.

Sænska lögreglan segir að hreyfingin hafi allt frá 1997 hvatt til ofbeldisverka og byltingar. Hreyfingin tengist einnig þremur sprengjuárásum í Gautaborg á síðasta ári. Meðlimir hreyfingarinnar eru sagðir heillaðir af skotvopnum og beri oft hnífa.

Í desember kom upp ósætti og óvinskapur á milli sænsks drengs og sómalskrar stúlku í skólanum. Í framhaldi af því mætti eldri bróðir stúlkunnar í skólann og réðst á sænskan dreng í hefndarskyni. Tilviljun ein réði því hver var fórnarlambið. Fjallað var um málið í staðarblaði og brást Nordiska Motståndsrörelsen við fréttinni. Nokkrum dögum eftir átökin á skólalóðinni mættu nokkrir meðlimir hreyfingarinnar utan við skólann, þeir voru með græn blys, sírenur og borða sem á stóð:

„Sænsk æska, sláðu á móti.“

Hér var ekki um neina unglinga sem voru mættir að skólanum heldur voru hér fullorðnir menn á ferð að sögn Dagens Nyheter.

„Þrátt fyrir lygar þeirra, þá verðið þið að vita að allt sem við gerum, gerum við fyrir ykkur. Þetta er landið okkar og það erum við sem ráðum hér.“

Eru mennirnir sagðir hafa sagt við nemendurna.

Göran Törnqvist, skólastjóri, kom þá út á skólalóðina og reyndi að fá nemendurna inn í skólann en eftir því sem hann segir þá voru margir þeirra áhugasamir um boðskap nýnasistanna.

Meðlimir Nordiska Motståndsrörelsen hafa birt greinar í eigin blaði þar sem þeir segja að þeir muni heimsækja fleiri skóla í bænum og að þeir hafi margoft dreift flugritum inni í skólanum sjálfum. Törnqvist segist hafa áhyggjur af öryggi nemenda og starfsfólks skólans. Aðspurður sagðist hann telja að sumir nemendanna væru að snúast til öfgahyggju vegna áróðursins.

„Sumir eru örugglega að snúast til öfgahyggju. Ég tel þó að við getum enn unnið þá á okkar band en við verðum að leggja mikið á okkur til þess. Annars munu nasistarnir sigra.“

Talsmaður Nordiska Motståndsrörelsen, Pär Öberg, vildi ekki tjá sig um málið við Dagens Nyheter.