Það leikur enginn vafi á að stríð setja mark sitt á umhverfi sitt og sögu okkar. Flest þessara spora sjást fljótlega en það var fyrst nýlega, rúmlega 70 árum eftir lok síðari heimsstyrjaldarinnar, sem spor eftir óhugnanlega fortíð fundust í norskum trjám.

BBC skýrir frá þessu. Þar kemur fram að í síðari heimsstyrjöldinni hafi stærsta herskip Þjóðverja, Tirpitz, verið staðsett við Noreg til að hræða Bandamenn frá því að ráðast til atlögu við þýska hernámsliðið í landinu. Skipið lá oft í fjörðum landsins og til að fela það fyrir Bandamönnum var gasi dælt út í kringum það svo það sást illa eða ekki.

Nú hafa vísindamenn komist að því að þetta gas hafði allt annað en góð áhrif á tré í nágrenni við legustaði skipsins. Claudia Hartl, hjá Johannes Gutenberg háskólanum, sagði í samtali við BBC að það sé mjög áhugavert að áhrif gassins sjáist enn í skógum í norðurhluta Noregs rúmlega 70 árum eftir að gasið var notað. Þjóðverjar hafi notað gas og hugsanlega önnur efni víðar í Evrópu og þar sé hugsanlega hægt að finna svipuð ummerki.

Hún uppgötvaði áhrif gassins á trén þegar hún vann að loftslagsrannsóknum í Kåfjord í Norður-Noregi. Tjón á trjánum og lítill vöxtur þeirra var eitthvað sem ekki var hægt að rekja til kulda eða skordýra. Árhringir trjánna segja sögu þeirra og þannig gat Hartl séð lífshlaup þeirra. Eitt tré hafði til dæmis ekki vaxið neitt í 9 ár og síðan tók það tréð 30 ár að ná eðlilegum vexti á nýjan leik.

Niðurstöður rannsóknarinnar hafa verið birtar í Geophysical Research Abstracts.