Aðfaranótt 10. desember 2015 var tvítug kona að skemmta sér í Osló. Á öðrum stað í borginni var 26 ára maður að skemmta sér. Þau vissu deili á hvort öðru en lítið meira en það. Þau áttu í samskiptum og spurði maðurinn hvort hann mætti sofa heima hjá konunni því hann hefði ekki í nein hús að venda þessa nótt. Hún sagði já við þeirri ósk hans.

Þegar hann kom heim til hennar sló hann hana margoft í andlitið og lamdi höfði hennar utan í vegg. Því næst nauðgaði hann henni. En þar með var ofbeldinu ekki lokið því þegar nauðgunin var yfirstaðin stakk maðurinn konuna margoft með hníf, meðal annars í andlitið, hálsinn og efri hluta líkamans. Konan náði að verjast og komast út úr íbúðinni og til nágranna síns sem kallaði lögregluna á vettvang.

TV2 skýrir frá þessu og segir að nú sé búið að gefa út ákæru á hendur manninum. Samkvæmt ákærunni slaknaði lítið á manninum eftir að hann var handtekinn og hótaði hann að drepa lögreglumenn þegar ekið var með hann á lögreglustöðina. Þegar þangað var komið sparkaði hann í andlit lögreglumanns.

Maðurinn hefur setið í gæsluvarðhaldi síðan 11. desember 2015.

Trine Rjukan, lögmaður þolandans, sagði að konan væri illa farin eftir ofbeldið og að lífsgæði hennar væru minni en áður.

Málið verður tekið fyrir hjá þingrétti í Osló í lok apríl og er reiknað með að réttarhöldin standi í 10 daga. Saksóknari fer fram á að maðurinn verði dæmdur til vistunar á réttargeðdeild og fái viðeigandi umönnun.

Maðurinn neitar að hafa nauðgað konunni eða reynt að drepa hana en viðurkennir að hafa beitt hana ofbeldi.