Frönsk yfirvöld segja að rúmlega 78.000 íbúar þar í landi ógni öryggi landsins. Upplýsingar um þetta fólk hafa nú verið skráðar í alþjóðlegan gagnagrunn sem evrópsk lögregluyfirvöld hafa aðgang að. Gagnagrunnurinn er sagður innihalda upplýsingar um „hættulegustu íbúa álfunnar“.
Á síðasta ári voru nöfn 134.000 manns skráð í gagnagrunninn. Frá 2015 hefur orðið mikil aukning í skráningum í gagnagrunninn en það gerðist í kjölfar hryðjuverka liðsmanna Íslamska ríkisins í París þar sem 130 manns voru myrtir.
Þýski þingmaðurinn Andrej Hunko, hefur verið gagnrýninn á gagnagrunninn og þær skráningar sem hafa verið nefndar „leynilegar kannanir“. Þessar kannanir eru gerðar á fólki sem er grunað um að ógna öryggi ríkja eða almennings. Kannanirnar eru virkar í eitt ár nema ríkin framlengi þær. Hunko óttast að lögreglan misnoti kerfið til að fylgjast með fólki og rannsaka önnur afbrot sem ekki ógni öryggi einstakra ríkja eða almennings.
Hann segir að slík notkun geti haft í för með sér að fylgst sé með ættingjum grunaðra og öðrum sem umgangast viðkomandi. Hann telur einnig að það hversu oft franska lögreglan hefur notað gagnagrunninn bendi til að verið sé að misnota hann.
