Lögreglumenn í flugstöðvardeild lögreglunnar á Suðurnesjum höfðu afskipti af fjórum erlendum karlmönnum í Flugstöð Leifs Eiríkssonar í vikunni vegna gruns um að þeir væru að reyna að komast með þýfi úr landi.
Í tilkynningu frá Lögreglunni á Suðurnesjum kemur fram að mennirnir höfðu dvalið hér á landi í viku og voru þeir grunaðir um að hafa stundað þjófnaði á skipulagðan hátt.
„Í handfarangri þeirra fannst umtalsvert magn af meintu þýfi og voru þeir handteknir og færðir á lögreglustöð. Varningurinn samanstóð einkum af fatnaði, þar á meðal dýrri merkjavöru, vítamínum og öðrum fæðubótarefnum. Mennirnir voru yfirheyrðir og héldu eftir það úr landi.“