Illugi Jökulsson, rithöfundur og fjölmiðlamaður, segir leiðara Harðar Ágústssonar, ritstjóri Markaðarins, í Fréttablaðinu í dag vera gífuryrði. Hann telur Fréttablaðið notað markvisst í áróðri gegn kröfum verkalýðshreyfingarinnar.

„Sko. Sé það sannfæring þeirra sem skrifa skoðanagreinar í Fréttablaðið að kröfur verkalýðshreyfingarinnar séu óhóflegar, þá er það réttur þeirra og skylda að segja frá því hreinskilnislega. En því miður virðist mér að stuðningur Fréttablaðsins við málstað atvinnurekenda sé kominn yfir allan þjófabálk,“ segir Illugi.

Sjá einnig: Hörður varpar sprengju og segir fólki að spenna beltin – „Allir tapa á þessari brjálsemi sem er í uppsiglingu “

Líkt og DV fjallaði um fyrr í dag þá er Hörður mjög stóryrtur í leiðaranum og fer ófögrum orðum um Ragnar Þór Ingólfsson, formann VR, og Sólveigu Önnu Jónsdóttur, formann Eflingar. Illugi telur að Hörður sé vísvitandi að loka augum fyrir stuðningi við verkalýðshreyfinguna.

„Hörður Ægisson er til dæmis maður vel viti borinn. Rant hans um „vanstillt […] lýðskrum“ og „rugl“ og „marxískan orðavaðal“ sýnir hins vegar að hann lokar vísvitandi augum fyrir því af hverju hin nýja verkalýðsforysta er fram komin og nýtur stuðnings hjá sínu fólki. Og nú er fréttadeild Fréttablaðsins í mjög vaxandi mæli beitt til stuðnings málstað atvinnurekenda. Það er augljóst,“ segir Illugi.