Maður liggur nú í einangrun á Landspítalanum með mislinga. Þetta kemur fram í fréttatilkynningu á vef Landlæknis. Maðurinn kom með flugi frá Filippseyjum 14. febrúar og ferðaðist með vélum Icelandair (FI455) frá Lundúnum og síðan Air Iceland Connect (NY356) frá Reykjavík til Egilsstaða 15. febrúar.
Farþegar í flugunum hafa fengið nauðsynlegar upplýsingar og leiðbeiningar frá sóttvarnalækni. Samband hefur einnig verið haft við þá aðila sem maðurinn hefur verið í kringum eftir komu hans til landsins.
Farþegar eru hvattir til að leita til sinna lækna fram til 7. mars ef þeir finna fyrir einkennum sem geta bent til mislinga, sérstaklega ef þeir eru óbólusettir.
Einstaklingur er aðeins smitandi eftir að einkenni koma fram og 7-10 daga eftir það. Einkennin koma fram á 1-2 vikum eftir smit, hámark 3 vikur.
Þeir sem eru bólusettir eða hafa þegar fengið mislinga þurfa ekki að hafa áhyggjur. Þeir sem ekki eru bólusettir geta fengið bólusetningu ef minna en 6 dagar eru liðnir frá mögulegu smiti.
Á vef landlæknis má finna frekari upplýsinga um mislinga.