Íslenskur lögreglumaður sem handtekinn var og ákærður fyrir líkamsárás í Færeyjum um helgina var dæmdur örskömmu eftir handtöku. Hlaut hann 50 daga skilorðsbundið fangelsi og þriggja ára ferðabann til Færeyja. Sá sem varð fyrir árásinni var annar Íslendingur, ferðafélagi mannsins.
Þetta hefur DV fengið staðfest frá saksóknaranum í Þórshöfn, Lindu Margrethe Hesselberg. Hún neitaði að gefa upp nafn mannsins og sagði slíka upplýsingagjöf ekki samrýmast færeyskum reglum og venjum. Hún sagði að maðurinn hefði ekki áfrýjað dómnum en von er á honum til landsins á mánudag, með flugi til Akureyrar.