Aðalmeðferð í máli Khaled Cairo fór fram í Landsrétti fyrr í dag en hann var dæmdur í héraðsdómi í sextán ára fangelsi fyrir morðið á Sanitu Brauna við Hagamel í Vesturbænum í fyrra. Það var þann 21.september síðastliðinn að Sanita Brauna fannst látin í íbúð sinni á Hagamel. Sanita var frá Lettlandi en var búsett hér á landi og hafði atvinnu hér.

Hér fyrir neðan má sjá myndband af því þegar Cairo er leiddur út á nærbuxum einum klæða en Fréttablaðið birtir myndbandið. Það hefur ekki áður sést. Khaled Cairo var alblóðugur frá toppi til táar og grínaðist eftir handtöku, að sögn Sveins Magnússonar lækni við aðalmeðferð málsins í fyrra en Sveinn gerði réttarlæknisfræðilega úttekt á Khaled.

Samkvæmt Sveini þá fíflaðist Khaled þegar átti að taka myndir af honum og „og stillti sér upp eins og módel. Þetta var mjög óvenjulegt af því sem maður á að venjast,“ sagði hann við aðalmeðferð í fyrra. Sveinn segir að inn á milli hafi Khaled spurt um afdrif Sanitu en sagði þó að hún ætti ekkert gott skilið þar sem hún „ætti annan vin“.

Samkvæmt dómi í fyrra sló hann Sanitu ítrekað í andlitið og höfuð með tveimur til þremur glerflöskum og slökkvitæki og hert kröftuglega að hálsi hennar.