Klukkan 17.15 í gær varð umferðarslys á Seltjarnarnesi. Þar var bifreið ekið framan á kennslubifreið sem í voru ökukennari og nemandi hans. Þeir slösuðust ekki. Tjónvaldurinn stakk af frá vettvangi en lögreglan hafði upp á honum skömmu síðar. Hann er grunaður um að hafa verið undir áhrifum vímuefna og auk þess var bifreið hans á ónýtum dekkjum. Tjónvaldurinn fékk höfuðhögg við áreksturinn og var fluttur á slysadeild.

Um klukkan 18 höfðu lögreglumenn afskipti af ökumanni í miðborginni en sá hafði ekki hreinsað snjó/hrím af bílrúðunum.

Klukkan hálf þrjú í nótt var ofurölvi erlendur skipverji handtekinn við Hafnarfjarðarhöfn. Hann var vistaður í fangageymslu.

Klukkan þrjú í nótt var ungur maður vistaður í fangageymslu en hann var í mjög annarlegu ástandi. Ítrekað var búið að hafa afskipti af manninum þar sem hann var með ónæði en það dugði ekki til og endaði hann því í fangaklefa.

Á áttunda tímanum í gærkvöldi var brotist inn í bílasölu í Árbæjarhverfi. Ekki liggur fyrir hvort og þá hverju var stolið.

Einn ökumaður var handtekinn í nótt grunaður um ölvun við akstur. Fimm ökumenn voru handteknir í gærkvöldi og nótt grunaðir um að vera undir áhrifum fíkniefna.