Elliði Vignisson, bæjarstjóri í Ölfusi, skýtur á Seðlabankann og ákvörðun hans að taka niður málverk Gunnlaugs Blöndals. Málverk sýndi nekt og ku hafa farið fyrir brjóstið á starfsmanni bankans. Elliði ávarpar Seðlabankann og birtir djarfa mynd af sér og félögum sínum í „Fyrirmyndabílstjórafélaginu“.

Elliði stingur upp á að Seðlabankinn noti fremur þá mynd, sem má sjá hér fyrir neðan. „Ágæta bankaráð Seðlabanka Íslands. Fyrir hönd Fyrirmyndabílstjórafélagsins vil ég afhenda ykkur meðfylgjandi ljósmynd. Mælst er til að hún leysi af verk Gunnlaugs Blöndal sem ku hafa misboðið starfsmönnum og vafalaust gestum bankans,“ segir Elliði.

Hann bætir því að þessi nekt sé ekki klámfengin, líkt og á málverki Gunnlaugs. „Það er von okkar og trú að með þessu verki megi tryggja fjármálalegan stöðugleika langt umfram það sem tekist hefur með verkum Blöndal. Sú nekt sem þarna kemur fram er eingöngu upphafning þess stórfenglega sköpunarverks sem mannslíkaminn er en ekki klámfengin eins og vera kann að starfsmönnum bankans hafi þótt verk Blöndals. Megi Seðlabankinn njóta velgengni í störfum sínum og verða áfram dyggur vörður íslenskrar dyggðar,“ segir bæjarstjórinn.

https://www.facebook.com/photo.php?fbid=10156974550714181&set=a.94911884180&type=3&theater