Lögreglan á höfuðborgarsvæðinu hafði í mörg horn að líta í gærkvöldi og í nótt og er þó nokkur fjöldi mála skráður í dagbók lögreglu.
Rétt fyrir klukkan níu í gærkvöldi voru þrír einstaklingar handteknir í Hafnarfirði vegna líkamsárásar, vopnalagabrots og vörslu fíkniefna. Frekari upplýsingar um málið er ekki að finna í dagbók lögreglu.
Þá handtók lögregla mann upp úr miðnætti í Árbæ sem gerði tilraun til að ræna tösku af manni.
Þá veitti lögregla ökumanni eftirför sem ekki sinnti stöðvunarmerkjum lögreglu. Þetta var um hálf fjögur leytið í nótt og náðist maðurinn eftir eftirför. Hann var undir áhrifum fíkniefna auk þess að vera sviptur ökuréttindum. Undir morgun var einstaklingur handtekinn vegna líkamsárásar í miðborg Reykjavíkur og var hann vistaður í fangaklefa.
Auk ofangreindra mála hafði lögregla afskipti af nokkrum ökumönnum, sem ýmist reyndust ölvaðir undir stýri eða undir áhrifum fíkniefna.