Gul viðvörun er í gildi á Suðurlandi, Faxaflóa og Breiðafirði vegna hríðarveðurs sem skellur á í kvöld. Búist er við suðaustan 15-23 metrum á sekúndu með snjókomu eða slyddu en úrkoma færir sig yfir í rigningu nærri sjávarmáli og hlýnar.
Í viðvörun á vef Veðurstofunnar kemur fram að skilyrði til aksturs gætu orðið erfið vegna takmarkaðs skyggnis og snjóþekju, sér í lagi í uppsveitum og á heiðavegum, til dæmis Hellisheiðu, Bröttubrekku og á Vatnaleið.
Búist er við því að versta veðrið verði milli klukkan 18 og 22 í kvöld.
Í hugleiðingum veðurfræðings kemur fram að skil komi upp að suðvestanverðu landinu um kvöldmatarleytið. „Eftir snjókomu gærdagsins og áframhaldandi éljagang í dag eru líkur á að eitthvað af snjónum muni bráðna í kvöld þegar hlýnar, en á morgun kólnar aftur og er því viðbúið að svell myndist. Á morgun lægir víða og á þriðjudag og miðvikudag er útlit fyrir kalt hæglætisveður um allt land með éljum á víð og dreif.“