Sálfræðingafélag Íslands hefur sent frá sér yfirlýsingu vegna þeirrar umræðu sem hefur skapast vegna ummæla Öldu Karenar Hjaltalín hefur látið falla vegna sjálfsvíga. Meðal annars að það sé til einföld lausn við vandamálinu og sú lausn sé setningin „ég er nóg“. Telja margir að hún hafi með þessum orðum verið að gera lítið úr því alvarlega heilbrigðisvandamáli sem sjálfsvíg séu í samfélaginu. Alda Karen lét þessi ummæli falla í viðtali við stöð 2.

Yfirlýsing Sálfræðingafélagsins er ansi hörð og segir félagið að það sé skylda þeirra að benda á það þegar opinber umræða sé á villigötum. Í yfirlýsingunni kemur meðal annars fram.

„Heilbrigðisstarfsmönnum ber siðferðisleg skylda til að benda á það þegar opinber umræða er á villigötum, þegar hætta er á að umræða um heilsu fólks sé líklegri til að skaða en hjálpa“

Þau benda á að segja stundum „ég er nóg“ geti hjálpað þeim sem eðlilega eru stressaðir fyrir próf eða eru með fiðrildi í maganum þegar haldin er ræða. Hins vegar þegar um sé að ræða alvarlegan vanda eins og sjálfsvíg og skilgreindar geðraskanir þá duga ekki einfaldar skyndilausnir. Félagið bendir á að það sé skilda þeirra að benda á þetta og komi hvorki nornaveiðum við né menntasnobbi.

Hér að neðan má sjá yfirlýsinguna í heild.

Sálfræðingar hafa löngum talað fyrir því hversu mikilvægt er að fólk sé meðvitað um eigin styrkleika, hlúi að sér og hafi á sama tíma kunnáttu og getu til að leysa ýmis vandamál daglegs lífs með margskonar aðferðum. Mikilvægt er t.d að geta leitað til sinna nánustu ef þarf s.s. fjölskyldu, vina, vinnufélaga og einnig er gott að geta leitað upplýsinga á netinu. Það er gott og gagnlegt að vera bjartsýnn, setja sér markmið, vinna markvisst að þeim og vona það besta. Jafnvel segja stundum „ég er nóg“. Það getur hjálpað þeim sem eðlilega eru stressaðir fyrir próf eða eru með fiðrildi í maganum þegar halda á ræðu.