Sous vide
Fyrir nokkrum misserum sló „sous vide“-eldunaraðferðin í gegn. Allir keyptu sér tæki og rúmlega 11 þúsund Íslendingar gengu í samnefndan hóp á Facebook. Þegar fárviðrinu slotaði stóð eftir sú staðreynd að fólk var að sjóða mat í plasti. Sous vide-tækin munu fá heiðurssess í geymslum landsmanna eins og fótanuddtækin forðum.
Floss
Hinn hressi dans fór sem eldur í sinu á síðasta ári. Fyrst byrjuðu börnin og síðan fóru fullorðnir að reyna fyrir sér. Að sjá miðaldra fólk reyna að „flossa“ er mannleg eymd í sinni tærustu mynd. Floss-dansinn mun falla í gleymskunnar dá á árinu.
Tenerife
Hjarðhegðun Íslendinga er mikil og enginn er maður með mönnum nema hann skelli sér til „Tene“. Núna eru allir búnir að fara og það er vísindalega sannað að það er mannskemmandi að fara ítrekað í sumarleyfi á sama áfangastað. Fer einhver lengur í sumarfrí til Rimini eða Mallorca? Hélt ekki.
Skegg
Skegg á öllum kynjum er á útleið. Skegg eru óþægileg, fagurfræðilega á skjön og þjóna ekki neinum praktískum tilgangi.
Snapchat
Það mun fjöldi fólks nota Snapchat áfram á árinu en miðillinn er ekki lengur „kúl“. Það er auðvitað dauðadómur. Unga fólkið er farið á aðra miðla og eftir standa miðaldra einstaklingar og reyna að halda í rafrænan æskuljómann.