Margir notendur samfélagsmiðla hafa tekið eftir auglýsingum frá Flare Audio þar sem auglýstir eru Sleeep eyrnatappar úr málmi sem eiga að leysa öll vandamál tengd truflunum í svefni. Eyrnatapparnir sem um ræðir eru seldir í tveimur gerðum, annars vegar úr áli og hins vegar úr títani. Verðið er á bilinu 4.500 til 7.500 krónur. Vefsíða Flare er einnig fáguð og vöruverð í íslenskum krónum.

Ljóst er að háum fjárhæðum hefur verið eytt til að koma skilaboðunum áleiðis til Íslendinga og það virðist vera að borga sig. Hundruð Íslendinga hafa sett „like“ á færslur fyrirtækisins og tugir deilt henni áfram.

Tapparnir eru einnig til sölu á vef Amazon, þar fá þeir vægast sagt slæma dóma frá langflestum notendum. Sem dæmi segir einn sem keypti: „Fullkomin sóun á peningum! Ég var að vonast eftir einhverju betra en þessum venjulegu eyrnatöppum en ég gerði stór mistök. Þeir stoppa engan hávaða! Venjulegir eyrnatappar gera miklu meira. Það voru stór mistök að kaupa þá án þess að athuga hvað aðrir hafa sagt um þá.“ Fjölmargir notendur taka í sama streng, þar á meðal einn sem segir: „Þetta er einfalt, þeir virka ekki.“

Það eru þó ekki allir sammála því. Eyrnatöppunum fylgja leiðbeiningar þar sem farið er í gegnum hvernig á nákvæmlega að setja þá í. Einn notandi segir að það hafi þurft tíma til að venjast þeim. „Ég prófaði þá nokkrum sinnum og fannst ekkert varið í þá þangað til ég náði þeim alveg réttum. Þeir eru ekki mjög þægilegir en hvernig þeir ná að kæfa hávaða bætir upp fyrir það.“