Innflutningsfyrirtækið Nathan & Olsen hf. er að hefja innköllun á skvísunni The Yellow One, eða þessi gula, frá framleiðandanum Ella’s Kitchen eftir ábendingu um að sápubragð hafi fundist af vörunni.  Um er að ræða ávaxtamauk sem er ætlað börnum.

„Sápa er ekki notuð við framleiðslu og sápa kemst aldrei í snertingu við vöruna á neinu stigi í framleiðslunni. Verksmiðjur Ella’s Kitchen eru gæðavottaðar og undir ströngu eftirliti yfirvalda,“ segir í tilkynningu Nathan & Olsen hf. þar sem varan er innkölluð.

Varan fór síðast í dreifingu í júní síðastliðnum og allra leiða hefur verið leitað til að tryggja að hún hafi verið fjarlægð úr öllum verslunum. Samkvæmt tilkynningunni er um einstakt tilvik að ræða af lotu sem framleidd var í febrúar á síðasta ári.

„Yfir 170 þúsund stykki voru framleidd af lotunni sem fór í dreifingu til margra landa og hefur sambærileg ábending ekki komið fram annars staðar.“

Íslenskir neytendur ættu því ekki að þurfa að óttast, en þó er betra að hafa vaðið fyrir neðan sig.

Nathan & Olsen vilja þó, með tilliti til varúðarsjónarmiða og með hliðsjón af neytendavernd, tryggja að varan finnist hvergi hjá neytendum og biður því þá neytendur sem kunna að hafa vöruna undir höndum að skila henni inn til Nathan & Olsen, Klettagörðum 19, Reykjavík. 

Uppfært:

Rétt er að taka fram að aðeins  er verið að leita að einu lotunúmeri af  vörunni. Sú vara er best fyrir 02/2019, lotunúmer: 1903023312, strikamerki 5060107330030.