Kolfinna Baldvinsdóttir, dóttir Jóns Baldvins Hannibalssonar, segist standa með föður sínum. Þetta gerir hún á Facebook og sendir svo pillu á systur sína, Aldísi Schram. Fjöldi kvenna hefur stígið fram nýverið og lýst kynferðislegri áreitni hans, margar í Stundinni en það er þó ekki í fyrsta skiptið sem Jón Baldvin er sakaður um slíkt.
Sjá einnig: Aldís í átökum við Jón Baldvin: „Föður hennar hefur tekist að þagga þetta niður“
Kolfinna deilir í nótt á Facebook frétt Fréttablaðsins þar sem Aldís systir hennar lýsir upplifun sinni. „Voðalega á ég flottan pabba. Sem hefur ævinlega staðið með okkur. Eins og við systur höfum þakkað honum fyrir,“ skrifar Kolfinna og vísar þar til orða Aldísar sem sagði „voðalega á ég ljótan pabba“.
Aldís lýsti upplifun sinni af föður sínum, þar á meðal af veislu sem hún varð vitni af sem barn: „Um miðja nótt, á Miklubraut 68, líkast til 5 ára gömul, vaknaði ég í rúmi foreldranna – þar sem ég átti ekkert rúm, við háværa tónlist og drykkjulæti inni í stofu. Ég, sem svaf nakin – að fyrirskipan móðurinnar, klæddi mig og gekk inn í stofu, þar sem ég sá hana, hálfnakta, dansa upp á borði við mikinn fögnuð föðurins og hinna karlanna og sagði: „Ég er lítið barn sem þarf að sofa. Viljið þið vera svo góð að hætta að hafa svona hátt?“ Jón Baldvin Hannibalsson gekk þá til mín, settist á hækjur sér gegnt mér, horfði í augu mér, kveikti á vindli, sogaði inn reyknum og púaði framan í mig (móður minni til kátínu). Og þá hugsaði ég með mér: „Voðalega á ég ljótan pabba (en hitt vissi ég að hin svokallaða mamma mín væri vond).“
Kolfinna, systir hennar, skýtur sérstaklega á þessa lýsingu og segir: „Hún fer greinilega í leiðinleg partý“
