Óhætt er að segja að tollverðir hafi rekið upp stór augu þegar þeir opnuðu ferðatösku á flugvellinum nærri Hopa í Tyrklandi. Í töskunni var 27 ára kona frá Úsbekistan sem var að reyna að koma sér inn í landið.
Myndband af atvikinu má sjá hér að neðan en þar sjást tollverðir opna töskuna. Konan liggur áfram grafkyrr og hreyfir sig ekki fyrr en tollverðir segja henni að standa upp.
Með konunni í för var 27 ára karlmaður sem en þau voru að koma með flugi frá Georgíu. Í frétt Mirror kemur fram að konan hefði hlotið dóm í Tyrklandi og endurkomubann til fimm ára þegar hún reyndi, af einhverjum ástæðum, að smygla sér aftur inn í landið.
Parið var handtekið og á það yfir höfði sér fjársekt. Þá verður þeim að líkindum vísað aftur úr landinu.