Stéttarfélagið Framsýn mun fara fram á að lágmarkslaun á mánuði fyrir fullt starf verði 375 þúsund krónur. Þetta kemur fram í kröfugerð stéttarfélagsins sem birt er á heimasíðu Framsýnar, þar segir að kröfugerðin sé innlegg í sameiginlega kröfugerð Starfsgreinasambandsins og Landssambands íslenskra verslunarmanna.

Framsýn vill að samið verði um krónutöluhækkanir, styttingu vinnuvikunnar og að 80% vaktavinna teljist sem fullt starf. Einnig að starfsmenntun og ábyrgð í starfi verði almennt metin til hærri launa

Við undirbúning kröfugerðarinnar voru gerðar kannanir meðal félagsmanna, vinnustaðir heimsóttir og tveir félagsfundir haldnir, annar á íslensku og hinn á ensku. Fram kemur í kröfugerðinni að skattbyrði hafi aukist mest hjá lágtekjufólki og að því sé eðlilegt að krefjast þess að ríkisstjórnin komi til móts við þann hóp með skattkerfisbreytingum. Skoða þurfi þann möguleika að fjölga skattþrepum eða hækka persónuafslátt fólks á lágmarkslaunum.