„Ef þú ræður ekki mongólíta í vinnu, sem kunna hlutina, þú þarft að gera app og hefur sjö mánuði til þess, þá ætti það að duga.“ Þetta sagði Benedikt Bóas Hinriksson, blaðamaður á Fréttablaðinu, í Harmageddon í gær.

Þar ræddi Benedikt um „báknið“ í KSÍ, líkt og 433 greindi frá í gær. „Þetta bákn niður í Laugardal, sinnir A-landsliði karla. Þar komast 90 prósent af tekjum, þeir eru búnir að gleyma því að hér sé spilaður fótbolti á sumrin. Það var hrun í mætingu í fyrra, það var fyrsta sumarið þar sem það kostaði 2 þúsund krónur inn, fleira og fleira. KSÍ stofnaði starfshóp um að þessu ætti að taka á, það er níu mánaða bið eftir tímabilinu. Það er nægur tími, er það ekki?“ sagði Benedikt meðal annars.

Benedikt biðst afsökun á því að hafa látið þessi orð falla í stöðufærslu á Facebook. „Klúður. Í kaffileysi morgunsins varð mér á þau mistök að skíta all hressilega í heyið. Sagði orðið mongólíti í niðrandi merkingu í útvarpsviðtali. Það var ljótt af mér og mér þykir þetta miður. Downs félagið Við skulum öll hætta að nota þetta orð á þennan hátt í daglegu tali. Það er nefnilega glatað,” segir Benedikt sem hefur fengið klapp á bakið fyrir að biðjast afsökunar á mistökum sínum en hann merkti sérstaklega Downs-félagið í færsunni.