Fjöldi mæðra eru ósáttar við barnatíma RÚV, KrakkaRÚV, fyrir að sýna þátt þar sem ensk börn ræða um tilvist Jólasveinsins, Páskahérans og Tannálfsins. Um er að ræða fjórða þátt The World According to Kids, eða Heimssýn barna, sem var á dagskrá RÚV kl. 18 í gær. Eins og áður segir ræða börnin opinskátt um tilvist Jólasveinsins, Tannálfsins og Páskahérans, slíkar umræður hafa oft vakið deilur meðal foreldra enda er um að ræða tilfinningalíf ungra barna.
Það sem börnin sögðu í þættinum fór mikið fyrir brjóstið á mæðrum sem tjáðu sig um málið í Fésbókarhópnum Mæðratips í gærkvöldi, en hópurinn telur rúmlega 17.500 manns.
Móðirin sem vakti fyrst athygli á málinu segir að hún hafi verið að þýða það sem börnin sögðu í þættinum fyrir dóttur sína en hafi þurft að grípa til þess ráðs að ljúga hvað þau voru að segja varðandi tilvist Jólasveinsins og hinna. „Mér finnst þetta frekar fúlt, það geta kannski alveg ungir krakkar lesið textann.“
Önnur móðir segir svo vera: „Gott að minn 7 ára horfði ekki á barnatímann í kvöld! Hann les alltaf texta.“
Margar mæður lýsa vanþóknun sinni á því að þátturinn hafi verið sýndur í barnatímanum og talar ein um að senda skilaboð til dagskrárstjóra KrakkaRÚV vegna málsins.
