Landsréttur staðfesti fjögurra mánaða fangelsisdóm yfir erlendum karlmanni á sextugsaldri, El Mustapha Bkhibkhi, fyrir að hafa kynferðislega áreitt fjórtán ára stúlku í rúllustiga í Kringlunni. Bar hann fyrir sig að það væri eðlilegt að sýna ókunnugum börnum væntumþykju í heimalandi sínu.
El Mustapha var gefið að sök að hafa komið aftan að stúlkunni í rúllustiga, sagt henni að hann elskaði hana, kysst hana, haldið um axlir hennar og snert brjóst hennar utanklæða. Hann þekkti stúlkuna ekki.
Atvikið átti sér stað á öskudag í fyrra, stúlkan var í búningi og sagði El Mustapha að hann hefði fundist búningur hennar fallegur og því hafi hann ákveðið að faðma hana. Stúlkan var með vinkonum sínum þegar hann káfaði á henni og flýðu þær inn í verslun. Öryggisverðir gættu El Mustapha á meðan lögregla ræddi við hann.
El Mustapha hélt því fram að hann hefði faðmað stúlkuna einu sinni en fyrir dómi var það metið ótrúverðugt miðað við myndskeið sem staðfesta atvikið í rúllustiganum.
Eins og áður segir var hann dæmdur í fjögurra mánaða fangelsi. Dómurinn er skilorðsbundinn til tveggja ára og þarf hann að greiða stúlkunni 300 þúsund krónur í miskabætur.